बरुवा । उत्कृष्ट जितका साथ यहाँ सम्पन्न २९औं स्टार कप खुला नकआउट फुटबल प्रतियोगिताको उपाधि प्याराडाइज युवा क्लब, रत्ननगरले जितेको छ ।

माडी स्थित बरुवा खेलमैदानमा भएको फाइनलमा प्याराडाइजले सुर्यपुर फुटबल क्लब, कालिकालाई ३–१ ले हराउँदै उपाधिमाथि कब्जा जमाउन सफल भएको हो ।

महिलाहरुको महान चाड हरितालिका (तीज) को अवसर पारी समापन भएको प्रतियोगिताको विजेता प्याराडाइजले उपाधिसहित नगद २ लाख हात पार्यो भने उपविजेता सुर्यपुरले १ लाखसहित ट्रफी, मेडल र प्रमाणपत्रमा चित्त बुझायो ।

स्टार स्पोर्टस युवा क्लब, माडी–१, बरुवा बजार, चितवनको आयोजनामा सम्पन्न भएको प्रतियोगितामा कुल १२ टोलीहरुले सहभागिता जनाएका थिए ।