शनिश्चरे । झापाको अर्जुनधारामा आयोजित १४ वर्षमुनिका खेलाडीबीच भएको फुटबल प्रतियोगिताको उपाधि सेतीपानीले जितेको छ ।

अर्जुनधारा नगरपालिका १० नम्बर वडा खेलकुद विकास समितिको आयोजनामा भएको प्रतियोगिताको फाइनल खेलका लागि भएको उमेर विवादमा सहमति भएपछि आज खेल सञ्चालन भएको हो ।

खेलमा सेतीपानीले उपाधिको दाबेदार टोली गोलधापलाई २-१ गोलअन्तरले पराजित गरेको हो । सेतीपानीका विनय योङहाङले टोलीको जितमा दुवै गोल गरे भने गोलधापका उज्वल बानियाँले सान्त्वना गोल फर्काए ।

नगरका ८ वटा टोलीमध्ये सेतीपानीका सौरभ बानियाँ उत्कृष्ट खेलाडी बन्दा पार्शिक खतिवडा उत्कृष्ट गोलरक्षक र गोलधापका दिप्सन बस्नेत उत्कृष्ट रक्षक बने ।

विजेता सेतीपानीले उपाधिसहित नगद १५ हजार र उपविजेता गोलधापले नगद १० हजारसहित आकर्षक ट्रफी पायो ।