मेचीनगर । झापाको मेचीनगर ८ स्थित शान्ति वन बाटिकामा आजदेखि सुरु प्रथम इँटाभट्टा फुटबल प्रतियोगितामा झापा एफसीले विजयी सुरुवात गरेको छ । पाहुना टोली भारतको गोर्खा ब्वाइज सिलोङलाई पराजित गर्दै झापाले सेमिफाइनल यात्रा तय गरेको हो ।
एफसी इँटाभट्टाको आयोजनामा भएको उद्घाटन खेलमा झापा एफसीले २-१ गोलअन्तरमा पाहुना टोलीको चुनौती समाप्त पारेको हो । झापाका लागि दुवै गोल श्याम मुर्मूले गरेका हुन् भने गोर्खा ब्वाइजका लागि कप्तान सुरज गुरुङले गरेका हुन् ।
सुरुवाती अग्रता झापा एफसीले लिएको थियो । पहिलो हाफको २७औँ मिनेटमा श्याम मुर्मूले गोल गर्दै अग्रता दिलाएका थिए । तर, दोस्रो हाफको ८ मिनेटमै गोर्खा ब्वाइजका सुरज गुरुङले पेनाल्टीमार्फत बराबरी गोल गरे ।
खेलको इन्जुरी समयमा पुनः झापाका श्याम मुर्मूले व्यक्तिगत दोस्रो गोल गरेर टिमलाई अन्तिम चारमा पुराएका हुन् । उनी प्लेयर अफ दी म्याच बन्दै नगद दुई हजार एक सय पाउन सफल भए ।
शनिबार शनिश्चरे एफसी अर्जुनधाराले सतासीधाम स्पोर्टिङ क्लब शिवसताक्षीबीच खेल हुनेछ । कात्तिक ९ गते हुने फाइनल खेलको विजेताले नगद १ लाख ११ हजार १११ र उपविजेताले ५१ हजार १११ सहित आकर्ष ट्रफी पाउने छ ।
यसैगरी, विधागततर्फ पुरस्कृत खेलाडीले जनही ५-५ हजार र सर्वोत्कृष्ट खेलाडीले नगद १५ हजार पाउने छन् । प्रतियोगितामा आठ वटा टोली रहेका छन् ।
आयोजक क्लबका अध्यक्ष मनकुमार लिम्बूको अध्यक्षता तथा मेचीनगर नगरपालिकाकी उपप्रमुख मिना उप्रेतीको प्रमुख आतिथ्यमा प्रतियोगिताको उद्घाटन भएको थियो । प्रतियोगिताको सहआयोजक मेचीनगर ८ नम्बर वडा कार्यालय रहेको छ ।
