मेचीनगर । उत्कृष्ट पूनःरागमनका साथ आयोजक इट्टाभट्टा फुटबल क्लब, झापा जारी प्रथम इट्टाभट्टा कप खुला नकआउट फुटबल प्रतियोगिताको फाइनलमा प्रवेश गरेको छ ।

दोस्रो सेमिफाइनलतर्फ इट्टाभट्टाले शहरी प्रतिद्वन्द्वी शनिश्चरे फुटबल क्लब, झापालाई टाईब्रेकरमा ३–२ ले हराउँदै फाइनलमा स्थान सुरक्षित गरेको हो । त्यसअघि खेलमा पछि परेको स्थिति उल्टाउँदै आयोजक इट्टाभट्टाले रोमाञ्चक पूनःरागमनका साथ शनिश्चरेसँग निर्धारित समयको खेलमा २–२ गोलको खेलेको थियो ।

खेलमा इट्टाभट्टाका गोलरक्षक युवराज पुरी म्यान अफ दि म्याच घोषित भए । इट्टाभट्टाले अब कार्तिक ९ गते हुने फाइनलमा ह्यापी क्लब, काकरभिट्टासँग उपाधिका लागि भिड्ने छ ।

इट्टाभट्टा फुटबल क्लब, झापाको आयोजनामा जारी प्रतियोगिताको विजेताले उपाधिसहित नगद १,०१,१११ रुपैयाँ हात पार्नेछ भने उपविजेताले ५१,१११ रुपैयाँसहित ट्रफी, मेडल र प्रमाणपत्र प्राप्त गर्नेछ ।