माङसेबुङ । किरात धर्मगुरु मुहिङगुम अङसीमाङ लिङदेन आत्मानन्द सेइङ ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा आमन्त्रित पुरुष फुटबल प्रतियोगिता ‘आत्मानन्द गोल्ड कप–२०८१’ आयोजना हुने भएको छ ।

प्रतियोगिता २०८१ मंसिर ९ देखि २० गतेसम्म माङसेबुङ गाउँपालिका ५ मा अवस्थित आत्मानन्द रंगशालामा संचालन गरिने आत्म पत्रिव हक्चात यक्चुमका अध्यक्ष मनकुमार आङबुहाङले पत्रकार सम्मेलन गरी जानकारी दिएका छन् । सो फुटबल प्रतियोगितामा नेपाल र भारतका ८ चर्चित फुटबल टिमहरु सहभागी हुने निश्चित भएको छ ।

खेलको माध्यमबाट मनोरञ्जन र स्वास्थ्य जीवनका साथै किरात धर्मगुरुको शान्ति, एकता, मानवता र अहिंसाको सन्देश छर्न प्रतियोगिताको आयोजना गरिएको छ । आत्मानन्द गोल्ड कपमा नेपालबाट श्री तिजोक यूवा क्लब पाँचथर, दुधे यूथ क्लब झापा, चुलाचुली स्र्पोटिङ क्लब झापा, सिरिजंगा स्पोर्टिङ क्लब मोरङ, दमक भाङबारी स्पोर्टिङ क्लब झापा, माङसेबुङ गाउँपालिका इलाम र आयोजक युथ अफ माङसेबुङ रहेको छन् । यसैगरी भारतबाट एम.एफ.सि. दार्जिलिङ पाहुना टोलीको रुपमा खेलमा सहभागी हुने आङबुहाङले बताए ।