काठमाडौं । विश्व फुटबलमा शारीरिक रुपमा फरक रहेकाहरु बीच हुने एम्पुटी फुटबलको सर्वोच्च निकाय विश्व एम्पुटी फुटबल महासंघको नयाँ सदस्यमा नेपाल पनि थपिएको छ ।

विश्व एम्पुटी फुटबल महासंघले आफ्नो आधिकारिक सामाजिक सञ्जालमार्फत नेपाललाई महासंघमा नयाँ सदस्यका रुपमा आवद्ध भएकोमा स्वागत समेत गरेको छ ।

स्मरण रहोस, नेपालले केही महिना अघि बंगलादेशमा सम्पन्न एसियन एम्पुटी च्याम्पियनसिप खेल्दै अन्तर्राष्ट्रिय एम्पुटी फुटबलमा डेब्यु गरेको थियो । जहाँ नेपालले आयोजक बंगलादेशसहित इराक, उज्वेकिस्तान र इण्डोनेसियासँग प्रतिस्पर्धा गरेको थियो । उपाधि भने उज्वेकिस्तानले जितेको थियो ।