शिवसताक्षी । साविक विजेता समेत रहेको वार्ड नम्बर १० र वार्ड नम्बर ९ झापामा जारी शिवसताक्षी मेयर कप नकआउट फुटबल प्रतियोगिताको सेमिफाइनलमा प्रवेश गरेका छन् ।

दुधे रंगशालामा भएको दिनको पहिलो खेलमा वार्ड नम्बर १० ले वार्ड नम्बर ११ लाई ३–० को अन्तरले हराउँदै सेमिफाइनलमा प्रवेश गर्यो । खेलमा वार्ड नम्बर १० का टिकाराम रसाइली प्लेयर अफ दि म्याच चुनिए ।

त्यस्तै बिहीबार नै भएको दिनको दोस्रो खेलमा वार्ड नम्बर ९ ले वार्ड नम्बर ३ लाई ३–१ ले हराउँदै अन्तिम चारमा स्थान पक्का गर्यो । खेलमा वार्ड नम्बर ९ का साहिल लिम्बु प्लेयर अफ दि म्याच बने ।

प्रतियोगिता अन्तर्गत चैत्र २० गते शुक्रबार दुई सेमिफाइनल खेलहरु हुनेछन् । जस अन्तर्गत पहिलो सेमिफाइनल खेल वार्ड नम्बर १० र वार्ड नम्बर १ बीच हुनेछ भने दोस्रो सेमिफाइनल खेल वार्ड नम्बर ८ र वार्ड नम्बर ९ बीच हुने आयोजकले जानकारी दियो ।

शिवसताक्षी नगर खेलकुद विकास समितिको आयोजना तथा शिवसताक्षी नगरपालिका, झापाको संरक्षकत्वमा जारी प्रतियोगिताको विजेताले उपाधिसहित नगद ७५ हजार हात पार्नेछ भने उपविजेताले ४५ हजार प्राप्त गर्नेछ । फाइनल खेल यही चैत्र २२ गतेका दिन हुनेछ ।