फिदिम । नयाँ वर्ष २०८३ को अवसर पारेर पाँचथरको फाल्गुनन्द गाउँपालिका–१ नवमीडाँडामा प्रथम अध्यक्ष कप आमन्त्रित फुटबल प्रतियोगिता आयोजना हुने भएको छ। आयोजक तिजोक युवा क्लबले पत्रकार सम्मेलनमार्फत प्रतियोगिता तथा बृहत सांस्कृतिक कार्यक्रमबारे जानकारी गराएको हो।
क्लबका अध्यक्ष हेमराज आङ्देम्बेका अनुसार प्रतियोगिता वैशाख १ गतेदेखि सुरु भई पाँच दिनसम्म सञ्चालन हुनेछ। प्रतियोगितामा जम्मा ८ टिमको सहभागिता रहनेछ।
उद्घाटन खेल वैशाख १ गते दिउँसो ३ बजे आयोजक तिजोक युवा क्लब र माङ्सेबुङको आत्मा पवित्र हक्वात यक्चुम फुटबल क्लबबीच हुने तय भएको छ। वैशाख २ गते झापाको नवकिरण स्पोर्टिङ क्लब र फिदिमको पाँचथर फुटबल क्लबबीच प्रतिस्पर्धा हुनेछ।
त्यसैगरी वैशाख ३ गते पहिलो खेलमा मोरङको पथरी–११ फुटबल क्लब र सिलगुडीको केएफसी आमनेसामने हुनेछन् भने दोस्रो खेलमा धरानको सिटी एफसी र इलामको हेलीबोश एफसी भिड्ने कार्यक्रम रहेको छ।
प्रतियोगिताको सेमिफाइनल वैशाख ४ गते र फाइनल खेल वैशाख ५ गते हुने आयोजकले जनाएको छ। प्रतियोगिताका विजेताले रु २ लाख २२ हजार २ सय २२ र उपविजेताले रु १ लाख ११ हजार १ सय ११ नगदसहित ट्रफी, मेडल र प्रमाणपत्र प्राप्त गर्नेछन्।
फाल्गुनन्द गाउँपालिका वडा नं. १ र गाउँपालिकाको सहयोगमा सञ्चालन हुने प्रतियोगितालाई Mustang Beer ले प्रायोजन गरेको छ।
प्रतियोगितासँगै चर्चित कलाकारहरूको सांगीतिक प्रस्तुति पनि रहने आयोजकले जनाएको छ। फुटबल प्रतियोगिता तथा सांस्कृतिक कार्यक्रममा सहभागी हुन दर्शकहरूले टिकट काट्नुपर्ने व्यवस्था गरिएको छ।
