काठमाडौं । नेपाली राष्ट्रिय महिला फुटबल टोलीकी नियमित तथा महत्वपूर्ण सदस्य गीता रानाको घुँडाको शल्यक्रिया सम्पन्न भएको छ । केही दिन अघि सम्पन्न भारत विरुद्धको अन्तर्राष्ट्रिय मैत्रीपूर्ण फुटबल म्याचका क्रममा चोटिल बनेकी गीताले लामो समय मैदान बाहिर बस्नुपर्ने निश्चित छ ।

स्मरण रहोस, नेपालले भारतसँग उसकै घरेलु मैदानमा दुई मैत्रीपूर्ण म्याच खेलेको थियो । पहिलो खेलमा २–२ को बराबरी खेलेको नेपालले दोस्रो खेलमा गोलरहित बराबरी खेलेको थियो ।

साथै केही मै हुन गईरहेको एएफसी ओलम्पिक छनौटमा पनि गीताले नखेल्ने सम्भावना प्रबल छ । अप्रिल पहिलो सातादेखि हुन गईरहेको ओलम्पिक छनौटतर्फ नेपाल समूह सी मा परेको छ । जहाँ नेपालले बलियो भियतनामसँगै अफगानिस्तान र प्यालेस्टाईनसँग प्रतिस्पर्धा गर्नेछ ।

क्लब फुटबलमा एपिएफका लागि खेल्ने गीताले लामो समय आराम गर्नुपर्ने बताइएको छ । उनलाई पूर्ण फिट हुन समय लाग्ने भएकाले उनी सक्रिय फुटबलमा केही समय टाढै रहने अनुमान गरिएको छ ।