काठमाडौं । चोटपछि लामो समयपश्चात सक्रिय फुटबलमा फर्किएकी नेपालकी स्टार फरवार्ड साबित्रा भण्डारीले भारतमा गोकुलम केरला एफसीका लागि शानदार प्रदर्शन गरेकी छिन् ।

केरला वुमन्स लिगतर्फ बुधबार सम्पन्न आफ्नो पहिलो खेलमा गोकुलम केरलाले केरला युनाइटेडमाथि ११–० को फराकिलो जित निकाल्दा साबित्राको नाममा पाँच गोल रह्यो । साथै उनले दुई गोलका लागि अवसर पनि मिलाइदिएकी थिईन् ।

गोकुलमका लागि थप दुई गोल सन्ध्याले गरीन भने कप्तान कश्मिना, रेश्मा, विभियन र हरमिलनको नाममा एक–एक गोल रह्यो । खेलमा उत्कृष्ट प्रदर्शन गरे पनि साबित्राले पूरा समय भने खेल्न पाईनन् । खेलको ६०औं मिनटमा साबित्रा मैदान बाहिरिएकी थिईन् ।

स्मरण रहोस, एएफसी वुमन्स क्लब च्याम्पियनसिप खेल्ने तयारीमा समेत रहेको गोकुलम केरला एफसी जारी केरवा वुमन्स लिगको डिफेन्डिङ च्याम्पियन पनि हो ।