काठमाडौं । फिफा विन्डो अन्तर्गत दोस्रो अन्तर्राष्ट्रिय मैत्रीपूर्ण फुटबल म्याचमा भुटानले बंगलादेशमाथि झिनो अन्तरको जित निकाल्दै पहिलो मैत्रीपूर्ण फुटबल म्याचमा बेहोरेको हारको बदला लिएको छ ।

थिम्पु स्थित घरेलु मैदान चाङलिमिथाङमा भएको खेलमा भुटानले बंगलादेशमाथि १–० को जित निकाल्दै पहिलो खेलमा बेहोरेको हारको बदला लिएको हो । खेलको अन्तिमतिर किगा वाङचुकले गरेको एक मात्र गोल भुटानको ऐतिहासिक जितमा निर्णायक गोल बन्यो ।

स्मरण रहोस, पहिलो अन्तर्राष्ट्रिय मैत्रीपूर्ण म्याचमा बंगलादेशले भुटानमाथि समान १–० को जित निकालेको थियो । समग्रमा बंगलादेशमाथि भुटानको यो दोस्रो जित समेत हो । यसअघि भुटानले सन् २०१६ को एसियन कप छनौटतर्फ बंगलादेशलाई हराएको थियो ।