मरिण । छैठौं मरिण गाउँपालिका अध्यक्ष कप वार्डस्तरीय नकआउट फुटबल प्रतियोगिता अन्तर्गत शुक्रबार कुल चार खेलहरु सम्पन्न भएका छन् ।

बाह्रबिसे खेलमैदानमा भएको दिनको पहिलो खेलमा वार्ड नम्बर ५ (बी) ले वार्ड नम्बर ७ (बी) लाई ३–० को अन्तरले पराजित गर्यो ।

त्यस्तै दोस्रो खेलमा वार्ड नम्बर ४ (ए) ले वार्ड नम्बर ३ (ए) लाई पेनाल्टी शुटआउटमा ३–२ ले हरायो । त्यसअघि निर्धारित समयको खेल दुवै टोलीले गोलरहित बराबरी खेलेका थिए ।

त्यसैगरी पुरुषतर्फ कै तेस्रो खेलमा वार्ड नम्बर ७ (ए) ले वार्ड नम्बर २ लाई ३–० को अन्तरले पराजित गर्दै दोस्रो चरणमा स्थान बनाउन सफल भएको छ ।

त्यस्तै शुक्रबार नै भएको महिलातर्फको पहिलो खेलमा वार्ड नम्बर ४ ले वार्ड नम्बर २ लाई पेनाल्टी शुटआउटमा २–० ले हराउँदै फाइनलमा प्रवेश गर्यो । त्यसअघि निर्धारित समयको खेल दुवै टोलीले गोलरहित बराबरी खेलेका थिए ।

युवा तथा खेलकुद विकास समिति, मरिण गाउँपालिका, सिन्धुलीको आयोजनामा जारी प्रतियोगिताको विजेताले उपाधिसहित नगद ४० हजार हात पार्नेछ भने उपविजेताले २० हजार प्राप्त गर्नेछ । फाइनल खेल यही माघ ६ गतेका दिन हुनेछ ।