मरिण । झिनो अन्तरको जितका साथ बागमती गाउँपालिका, मकवानपुर यहाँ जारी प्रथम मरिण गोल्डकप खुला नकआउट फुटबल प्रतियोगिताको सेमिफाइनलमा प्रवेश गरेको छ ।

मंगलबार भएको अन्तिम क्वाटरफाइनलमा बागमतीले जनहितैषी युवा क्लब, सिन्धुलीलाई शून्यका विरुद्ध १ गोलले हराउँदै सेमिफाइनल स्थान सुरक्षित गरेको हो । बागमतीको जितमा श्री मगरले एक मात्र निर्णायक गोल गरे । निर्णायक गोलकर्ता श्री मगर नै खेलको म्यान अफ दि म्याच बने ।

बागमतीले अब माघ २३ गते बुधबर नै हुने पहिलो सेमिफाइनल खेलमा बागमती युवा क्लब, सर्लाहीसँग फाइनल प्रवेशका लागि प्रतिस्पर्धा गर्नेछ ।

मुङग्रे युनाइटेड युवा क्लब, मरिण गाउँपालिका–२, मुङग्रे खाटदमार, सिन्धुलीको आयोजनामा जारी प्रतियोगिताको विजेताले उपाधिसहित नगद ३ लाख हात पार्नेछ । फाइनल खेल यही माघ २५ गतेका दिन हुनेछ ।